Aankhon mein baaki reh gaye

Aankhon mein baaki reh gaye

Aankhon mein baaki reh gaye, ab tere khad-o-khaal se,
Lab pe hain kuchh sawal se, dil men hain kuch malaal se.

Tu jo gaya to yun laga, tanha hoon kainaat main,
Raatein thaki thaki meri, din bhi mere nidhaal se.

Itne kareeb hoon tere, rasta na wehem ko mile,
Soun tere hisaar mein, jagoon tere jamal se.

Mujh ko hain kaam aur bhi, kuch to karo mera khayal,
Aate ho jab khayal mein, jate nahi khayal se.

Tujh si haseen ghazal koi, mujh sa ghazal sara koi,
Duniya mein ho agar kaheen, waazeh karo misaal se.

Uss se gila aye dosto, itna sa hai ke wo mujhe,
Samjha nahi hai aaj tak, ghaafil hai mere haal se.